Leitað að ökumanni á rauðum Kia Rio

Mynd með færslu
 Mynd: Lögreglan á höfuðborgarsvæ?
Lögreglan á höfuðborgarsvæðinu biður ökumann á rauðum fólksbíl af gerðinni Kia Rio um að hafa samband sem allra fyrst. Bílnum var ekið um Laugaveg um það leyti sem síðast sást til Birnu Brjánsdóttur í eftirlitsmyndavélum í miðborginni. Hennar hefur verið saknað frá því aðfararnótt laugardags.

Síðast er vitað um ferðir Birnu á Laugavegi um hálf sex leytið um nóttina. Í tilkynningu frá lögreglu kemur fram að hún sést ganga ein síns liðs austur Austurstræti, Bankastræti og Laugaveg að húsi númer 31 þar til hún hverfur sjónum um klukkan 05:25.

Í eftirlitsmyndavélum sést rauði bíllinn aka Laugaveginn um þetta leyti. Í því skyni biður lögreglan ökumann bílsins um að hafa samband við lögreglu í síma 444-1109 sem allra fyrst. Þá biður lögreglan alla þá sem voru á ferðinni á þessum slóðum um hálf sex leytið aðfararnótt 14.janúar og kynnu að hafa veitt Birnu Brjánsdóttur athygli að hafa samband við lögreglu. 

 

Mynd með færslu
 Mynd: Lögreglan á höfuðborgarsvæ?
Mynd með færslu
 Mynd: Lögreglan á höfuðborgarsvæ?
Bíllinn er af gerðinni Kia Rio.

Að sögn lögreglu er síðast vitað um að Birna hafi verið í samskiptum við fólk á skemmtistaðnum Húrra við Tryggvagötu í Reykjavík aðfararnótt laugardags.  Lögreglan biður alla þá sem veitt geta upplýsingar um ferðir Birnu og hvar hún er niðurkomin að hafa samband við lögreglu í síma 444 1109.

Birna er um 170 sentímetrar á hæð, með sítt ljósrautt hár, klippt með topp fram á ennið. Hún var klædd í svartar gallabuxur, gráa peysu og svartan flísjakka með hettu og í uppreimuðum Dr. Martens skóm. 

 

Ásrún Brynja Ingvarsdóttir
Fréttastofa RÚV

Tengdar fréttir