Kannabis og refsingar, Gurrý og Hulli

19.05.2017 - 18:00
Mynd með færslu
 Mynd: wikimedia commons
Við höfum fjallað um kannabisneyslu Íslendinga undanfarið. Fyrr í vikunni ræddum við lögregluna sem sagði að það væri auðveldara að redda kannabis heldur en að panta pizzu og í gær sagði yfirlæknir fíknigeðdeildar að mikil aukning væri í tilfellum á geðdeild tengdum kannabisneyslu.  Helgi Gunnlaugsson prófessor í félagsfræði við Háskóla Íslands ætlar að tala við okkur á eftir. Hann hefur kannað viðhorf fólks til kannabisneyslu og refsinga.

Það eru örugglega margir byrjaðir á garðverkunum og eflaust margir sem verða í garðinum alla helgina miðað við veðurspána - en það er sól í kortunum meira og minna allstaðar á landinu í dag og um helgina. Garðyrkjufræðingurinn Guðríður Helgadóttir, sem stýrir þættinum Í garðinum með Gurrý, er föstudagsgesturinn okkar þessa vikuna. Hún er skólastjóri Garðyrkjuskólans og lumar á góðum ráðum varðandi garðræktina. 

Hugleikur Dagsson kom til okkar eins og alltaf á föstudögum. Hann talaði um blótsyrði í bíómyndum og hvernig þeim er oft breytt til að ofbjóða ekki áhorfendum þegar myndirnar rata í sjónvarp.

Það hefur vakið nokkra athygli að björgunarsveitir voru kallaðir til og beðnar um að vera við opnun Costco í næstu viku. Við spurðum Smára Sigurðsson, formann Landsbjargar út í þetta. Við töluðum líka við hann um landsþing björgunarsveitanna sem stendur nú yfir. Þar er meðal annars verið að ræða hvort viðbragðskerfið sé sprungið og hvað þurfi að gera til að mæta auknum straumi ferðamanna til dæmis.
 

 

Mynd með færslu
Guðmundur Pálsson
dagskrárgerðarmaður
Síðdegisútvarpið
Þessi þáttur er í hlaðvarpi